Dad badan ku hoy beelay dhulgariirkii Morocco ayaa ku rafaadsan guryo ku meel gaar ah ka dib habeenkii afraad ee ay bannaanada jiifaan, halka dadka tuulooyinka ah ee ku nool aagagga buuraleyda ah ee burburay ay ka dhawaajiyeen inay ka xun yihiin inaysan wax gargaar ah ka helin Maamulka.
Tirada dadka ku dhintay dhulgariirkii 6.8 magnitude ee ku dhuftay buuraha Atlas ee ku yaal buuraha Atlas dabayaaqadii fiidnimadii Jimcaha ayaa gaartay 2,901, halka tirada dadka ku dhaawacmayna ay kor u kacday 5,530, sida uu sheegay telefishinka qaranka.
Waa dhulgariirkii ugu dhimashada badnaa ee ka dhaca Waqooyiga Afrika tan iyo 1960-kii, waana dhulgariirkii ugu xoogga badnaa muddo qarni ka badan.
Samatabbixiyeyaal ka kala socday Spain, Britain iyo Qatar ayaa caawinayey kooxaha baadi goobka Marooko, halka dowladaha Talyaaniga, Belgium, Faransiiska iyo Jarmalka ay sheegeen inaan weli la aqbalin kaalmadooda.
Mehdi Ait Bouyali, oo 24 jir ah, ayaa ku sugnaa hareeraha wadada Tizi n’Test, kaas oo isku xira dooxooyinka fog fog iyo Marrakech, iyadoo ay la socdaan dad kale oo badbaaday oo iyaguna ka soo cararay tuulooyinkoodii burburay. Waxa uu sheegay in dadkaasi ay ka heleen raashin iyo bustayaal ay wateen dad baabuur watay balse aysan waxba ka helin gobolka.
“Tuulooyinkii dooxa waa la hilmaamay, waxaan u baahanahay gurmad nooc kasta ah, waxaan u baahanahay teendhooyin” ayuu yiri isagoo dhaliilay howlaha gurmadka ee dowladda.
Hamid Ait Bouyali, oo 40 jir ah, ayaa sidoo kale kaamamka ku lahaa waddada dhinaceeda.
“Maamulka waxa ay diiradda saarayaan bulshooyinka waaweyn ee maaha tuulooyinka fogfog ee ay sida xun u saamaysay masiibada,” ayuu yiri. “Waxaa jira tuulooyin ay weli ku aasan yihiin meydadka burburka hoostiisa.”
Rajadii laga qabay in la helo badbaado ayaa sii yaraanaysay, ugu yaraan sababtoo ah guryo badan oo dhoobo dhoobo ah ayaa ku burburay buuraha dushooda kuwaasoo ay adkaatay inla gaaro.
Muwaadiniinta caadiga ah ayaa sidoo kale caawinayey, sida Brahim Daldali, 36, oo ka yimid Marrakech, kaas oo isticmaalaya mooto si uu u qaybiyo cunto, biyo, dhar iyo bustayaal ay ku deeqeen saaxiibo iyo shisheeye.
“Waxba ma haystaan, dadkuna wey gaajaysan yihiin,” ayuu intaas ku daray.
